Рустами Эмомалӣ: “То моҳи март камбудиҳои сохтмони иншоот бартараф карда шавад”

Search form

Рустами Эмомалӣ: “То моҳи март камбудиҳои сохтмони иншоот бартараф карда шавад”

Раиси пойтахт аз сифати сохтмони иншоот изҳори норозигӣ кард.

Раиси шаҳри Душанбе Рустами Эмомалӣ дар ҷаласа доир ба ҷамъбасти натиҷаҳои рушди иҷтимоию иқтисодии шаҳри Душанбе аз сохтмони иншоот дар пойтахт изҳори норозигӣ карда, даъват намуд, ки дар муддати якчанд моҳ камбудиҳо дар ин самт бартараф карда шаванд.

Тавре ки маркази матбуоти шаҳрдории пойтахт хабар медиҳад, Рустами Эмомалӣ зикр кард, ки  солҳои ахир сохтмони манзил барои аҳолӣ зиёд шуда, дар баробари ин сифати сохтмонро беҳтар кардан лозим аст, то ки биноҳои сохташуда ба насли оянда муддати тӯлонӣ хидмат кунанд.

“Иншооту биноҳои шаҳр бояд бо усули замонавӣ ва бо дарназардошти санъати баланди меъморӣ, зебо ва бо сифати баланд бунёд карда шаванд, то ки ба наслҳои оянда садсолаҳо хизмат расонанд”, - таъкид дошт ӯ.

Ба гуфтаи раиси пойтхт, дар сохтмони манзил ширкатҳо меъёрҳоро риоя намекунанд ва дар ин робита кори комиссияҳои қабули давлатии иншооту биноҳо беҳбудиро тақозо менамояд.

“Зеро аксар вақт биноҳо бе инобати роҳҳои зарурӣ, майдончаҳои бозии кӯдакон, шароит барои маъюбон, таваққуфгоҳҳо бунёд карда мешаванд”, - изҳор дошт ӯ.

Гуфта мешавад, вобаста ба ин, ба муовини якум ва сохторҳои дахлдор дастур дода шуд, ки ҷиҳати бартараф намудани камбудиҳои ҷойдошта тадбирҳо андешанд.

Зимнан зикр шуд, ки соли 2021 дар шаҳри Душанбе ба маблағи 7 млрд сомонӣ 182 иншооти ҷашнӣ ва дигар биноҳо мавриди баҳрабардорӣ қарор гирифтанд.

Ёдрас мекунем, ки зимни ироаи паём ба парлумони моҳи декабри соли гузашта президенти мамлакат Эмомалӣ Раҳмон зикр кард, ки сохтмон яке аз соҳаҳои муҳимми иҷтимоиву иқтисодӣ, инъикоскунандаи рушди кишвар ва сатҳу сифати зиндагии мардум мебошад.

Сарвари давлат таъкид дошт, ки Кумитаи меъморӣ ва сохтмон, мақомоти иҷроияи маҳаллии ҳокимияти давлатӣ ва дигар мақомоти марбута ҳангоми таҳия ва татбиқи нақшаҳои генералии шаҳрҳо ва шаҳраку деҳоти мамлакат банақшагириву бунёди иншооти иҷтимоиву сайёҳӣ ва дигар иншоотро бо риояи ҳатмии қоидаву меъёрҳои шаҳрсозӣ ва сохтмон, санъати баланди меъморӣ, истифодаи васеи унсурҳои меъмории милливу замонавӣ, технологияҳои муосир ва масолеҳи сифатноки сохтмон таъмин намоянд.

“Илова бар ин, ҳангоми лоиҳакашӣ зарур аст, ки пеш аз ҳама, сохтмони мактабҳо, боғчаҳои кӯдакон, марказҳои саломатӣ ва дигар инфрасохтори иҷтимоӣ ва коммуникатсионӣ ба нақша гирифта, дар марказҳои шаҳру ноҳияҳо бунёди ҳатмии биноҳои истиқоматии баландошёна пешбинӣ карда шавад”, - изҳор дошта буд президент.

 Asia-Plus

Tajik